Пред извесно време Audi одлучи темелно да го освежи електричниот E-Tron SUV, а освен визуелните промени, моделот доби и ново име, како и нови погони. Сега, во салонот на Audi во Скопје пристигна новиот Q8 E-Tron – и тоа во Sportback верзијата.
Audi Q8 E-Tron е добро познат модел, но со ново име и освежен надворешен дизајн. Германците сменија многу повеќе елементи отколку само амблемот и браниците. Но, ајде да почнеме од надворешноста. На предниот дел, браникот е променет и има доста различен дизајн од претходно, LED Matrix фаровите исто така се со променета графика, а новост е LED лентата над решетката. Страничниот дел има некои променети елементи и сега се достапни нови дизајни за тркалата. На задниот дел промените се посуптилни и може да се забележи нов браник и нов спојлер на вратата од багажникот.
Конкретниот модел е во S-Line варијанта која добива малку поспортски и поатрактивен изглед. Промените на надворешноста, сепак, имаат уште една улога – ја подобруваат аеродинамиката. Коефициентот на отпор на воздухот падна на 0,24 во верзијата Sportback и на 0,27 во класичниот SUV. Ова исто така значи подобар опсег со едно полнење.
Кабината не претрпе некоја голема револуција. Внатре, сè изгледа познато, задржан е не само стилот, туку и оперативниот концепт. Сепак, клиентите ќе можат да сметаат на нови украси во кабината и различни бои на тапацирот. Пред возачот останува истата дигитална инструмент табла, додека на централната конзола има два екрани, од кои едниот е наменет за инфозабавниот систем, а другиот под него е наменет за контролите на клима уредот. Интересно е и тоа што се задржани сите физички копчиња кои беа присутни и пред фејслифтот. Повторно и тука, бидејќи станува збор за S-Line варијанта, добиваме спортски седишта и шевови во црвена боја низ целата кабина.
Клучната промена кај овој автомобил се батериите. Моделот Q8 E-Tron сега има батерии со капацитет од 95 kWh и 114 kWh. Ова јасно ќе влијае на опсегот што го нуди овој автомобил, кој ќе се зголеми до 600 километри со едно полнење.
Audi претстави и нови електрични мотори со погусто намотување. Ова се претвора во зголемување на нивната ефикасност за 6% и исто така овозможи зголемување на моќноста и вртежниот момент. Покрај тоа, инженерите ја подобрија потрошувачката на енергија – таа треба да остане на пониско ниво. Се очекува да се движи од 23 kWh до 27 kWh во просек, што е навистина добар резултат.
Достапни се вкупно три верзии за новиот Q8 E-Tron. Понудата започнува со Q8 50 E-Tron верзијата која користи батерија од 95 kWh и нуди 340 коњски сили и 664 Nm вртежен момент. Досегот овде изнесува 491 километар за стандардната верзија и 505 километри за Sportback верзијата. Следна е Q8 55 E-Tron верзијата која добива батерија со капацитет од 114 kWh и нуди 408 коњски сили и 664 Nm вртежен момент. Досегот овде се зголемува на 582 километри за стандарниот SUV и 600 километри за Sportback верзијата.
Понудата завршува со спортската SQ8 E-Tron верзија. Тука на располагање имаме 503 коњски сили и вртежен момент од 973 Nm. Досегот варира од 494 до 513 километри во зависност од телото. Исто така, секоја верзија стандардно има погон на четири тркала. Послабите варијанти користат два електромотори, додека SQ8 има три единици.
Моќта на полнење сега достигнува максимални 170 kW. Овде Audi сè уште не е во прв план, иако Германците чекаат да се префрлат на целосно нова платформа. Сегашниот дизајн ви овозможува да ги полните 55 E-Tron и SQ8 верзиите со моќност до 170 kW. Послабиот модел, Q8 50 E-Tron, има максимална моќност на полнење од 150 kW. Стандардниот вграден полнач со наизменична струја нуди моќност од 11 kW и опционално може да се замени со 22 kW.
Повеќе информации за автомобилот може да најдете ТУКА или да го посетите продажниот салон на Audi.
