Дали некогаш сте помислиле какви перформанси би имал Ford Mustang со мотор од Focus RS? Ни јас… но група од пет механичари во гаражата на Ford Performance го испробале тоа и на крај излегло дека е уствари одлична идеја.
Од оваа есен новиот Mustang ќе може да го одберете со 2.3 литарскиот EcoBoost мотор од Focus RS, наречен 2.3L High Performance Package кој ќе нуди 330 коњски сили и 475 Nm вртежен момент, 20 коњски сили повеќе од стандардната конфигурација на entry-моделот со што забрзувањето до 100 км/ч ќе може да го достигне за отприлика 4 ипол секунди.
Максималната брзина е зголемена на 250 км/ч и моторот исто така е модифициран да биде одлично компатибилен со мануелниот менувач со 6 брзини или со 10-брзинскиот автоматски менувач. Како опција ќе има и нов Handling Package кој содржи поголеми 19 инчи алуминиумски тркала со спортски кочници, специјално калибрирани MagneRide амортизери и Torsen спортски диференцијал.
Во изјавата, главниот инженер на Mustang, Carl Widmann- кажува дека не само тоа што моторот има поголема коњажа, туку пошироката крива нуди над 90% од вртежниот момент помеѓу 2500 и 5300 вртежи во минута, што е за 40% повеќе од стандардниот EcoBoost мотор. Исто така ќе нуди повеќе сила до 6500 вртежи во минута-redline, што значи дека ентузијастите ќе можат повеќе да уживаат во возењето.
