Програмата на постојана еволуција и подобрување ја одржува Toyota RAV4 на врвот на својата игра речиси 30 години. Верна на досегашното досие за редовно воведување свежи идеи за одржување на привлечноста на клиентите, Toyota успешно го примени своето водечко знаење за електрификација за да испорача хибридни и plug-in хибридни погонски единици, носејќи нови нивоа на ефикасност, одржувајќи автентична SUV практичност и перформанси. Сега, во понудата на RAV4 се приклучува и спортска GR Sport верзија.
GR Sport третманот дава храбра изјава на стилот со додавање на облоги околу тркалата во пијано црна боја, странични лајсни и елементи на задната врата. Напред има поистакнати рамки за светлата за магла со иста црна мрежа како решетката и нови предни спојлери – обработени во темно сребрена боја на хибридниот модел и, со различен дизајн соодветен на погонската единица, метално сива боја кај Plug-in хибридниот модел. Дискретната ознака GR на предната решетка и задната врата ја означуваат поспортската класа. Новиот RAV4 GR Sport е првиот модел со алуминиумски тркала доработени со помош на нова, ултра прецизна техника на сечење. 19-инчните бандажи, вградени стандардно, се во сјајно црна боја.
Спортскиот, но софистициран изглед се пренесува и во внатрешноста каде што спортските предни седишта се обложени со тактилен тапацир со ефект на велур со потпори од синтетичка кожа – материјали без производи од животинско потекло. Наслоните за глава се со логото GR, додека контрастите се забележани со сребрени шевови на седиштата, воланот, рачката на менувачот и металните детали на вратите и воланот. Логото GR е исто така прикажано на патосниците и на воланот.
Новите модели доаѓаат стандардно со новиот мултимедијален систем со 10,5-инчен дисплеј со висока резолуција и приспособлив 12,3-инчен дигитален инструмент кластер за возачот, кои се клучни елементи во надградбата на RAV4 за моделската 2023 година. Слично на тоа, функциите за безбедност и помош на возачот на Toyota T-Mate ја вклучуваат дополнителната функционалност на последната генерација на Toyota Safety Sense. Пакетот го вклучува новиот Emergency Steering Assist систем и подобрен Pre-Collision систем.
GR Sport верзијата кај RAV4 е достапна со самополнечкиот хибриден погон на Toyota кој користи 2.5-литарски атмосферски бензинец и два електромотори, по еден на секоја оска. Вкупната системска моќност на овој погон изнесува 222 коњски сили. Исто така, достапна е и со Plug-in хибридниот погон кој користи исто 2.5-литарски атмосферски бензинец, како и два електромотори, но тука вкупната системска моќност е зголемена на 306 коњски сили. Двете верзии стандардно се опремени и со AWD-i погонот на сите четири тркала.
Поспортскиот изглед е надополнет со дополнителни подобрувања на суспензијата кај овој GR Sport модел. Новите поцврсти пружини и поставките на амортизерите се очекува да му дадат на RAV4 GR Sport многу подобро управување и да понудат генерално попривлечно возачко искуство.
