Toyota ги освежи сите изведби на моделот Corolla. Додека видливите измени на надворешноста и внатрешноста се еволуција на дизајнот на дванаесеттата генерација на Corolla, направени се позначајни промени во погонската група и електрониката. Со свеж стил, воведување на хибридна електрична технологија од петтата генерација, сеопфатно надградено дигитално корисничко искуство и проширен опсег на Toyota T-Mate безбедносни и помошни функции, новата Corolla е опремена да ја зајакне својата улога како главен модел за волумен за Toyota во Европа.
Секоја изведба на Corolla има свој изглед и привлечност. Новата гама добива порафиниран и современ изглед со промени во предната решетка, рамките за светлата за магла и нови дизајни на алуминиумски бандажи. Повисоките нивоа на опременост кај хечбекот и Touring Sports моделите добиваат нови Bi-LED фарови кои доаѓаат со адаптивен систем за долго светло (AHS).
Изборот на бои за надворешноста вклучува три нови бои инспирирани од актуелните трендови во архитектурата, дизајнот на производите и модата. Juniper Blue е новата клучна боја за хечбекот и Touring Sports, со живописен и разгорен тон. Кога се гледа одблиску, открива црвени подтонови кои создаваат свеж ефект со суптилни промени во бојата. За седанот има нова зелена Midnight Teal боја која има елегантен финиш кој открива еден посебен ефект кога се гледа од одредена перспектива. Metallic Grey бојата е достапна за сите изведби и е безвременска нијанса со широка привлечност.
Внатрешноста добива помодерно и попремиум чувство. Комбинациите на облоги и тапацири на седиштата ги следат новите „Dark and Light Harmony“ теми со координирани бои и завршетоци за да и дадат на кабината современо и елегантно чувство. Новата Corolla има корист од најновите дигитални и мултимедијални карактеристики на Toyota, дизајнирани за подобро корисничко искуство, а новите функции и надградби доаѓаат „преку воздух“.
Зголемениот мултимедијален дисплеј од 10.5-инчи прикажува графика со висока резолуција и екранот е со специјална фолија против отсјај, што обезбедува одлична видливост во сите услови на осветлување. Дигиталната инструмент табла за возачот, исто така, претрпе трансформација со нов дисплеј од 12.3-инчи кој може да се приспособи по желба на возачот во четири различни режими: Casual, Smart, Sport и Tough.
Новата Corolla се одликува со петтата генерација на само-полнечки, целосно хибриден електричен систем. Како и кај сегашниот модел, достапни се хибридни погони со 1.8-литарски и 2.0-литарски бензински мотор. И двете верзии имаат корист од значајните промени на нивниот конвенционален мотор и електричниот мотор кои го подобруваат искуството во возењето со дополнителна моќност, подобрени перформанси и исти или помали емисии на CO2 (во зависност од погонската група). Единицата за контрола на моќноста (PCU) и моторот на менувачот се редизајнирани, а литиум-јонската батерија е помоќна, но сепак помала и полесна (масата е намалена до 18 килограми, во зависност од погонската група).
Вкупната моќност од 1.8-литарскиот систем е 140 коњски сили, со што се намалува за 1.7 секунди времето на забрзување од 0-100 км/ч, односно сега изнесува 9.2 секунди. И покрај ова зголемување на перформансите, се очекува емисиите на CO2 да бидат непроменети, односно 102 г/км. За системот со 2.0-литарски мотор, вкупната моќност се зголеми на 196 коњски сили и речиси половина секунда е намалена од времето за забрзување од 0-100 км/ч кое сега изнесува 7.5 секунди.
Понатамошни чекори се преземени за да се испорача забрзување кое се чувствува природно за возачот. Претходно, фокусот беше на линеарното забрзување, а сега рекалибрацијата на хибридната контрола произведе забрзување што подобро ја отсликува намерата на возачот и неговата употреба на педалата за гас создавајќи соодветна Г-сензација и интуитивно чувство. Ова е постигнато со намалување на брзината на моторот при забрзување, додека и бучавата од погонот при забрзување исто така е намалена.
Од своето воведување во 2020 година, GR SPORT изведбата се покажа како многу успешна во обезбедувањето поспортски профил за Corolla и проширување на привлечноста на автомобилот, особено помагајќи да се привлечат нови клиенти во брендот Toyota. Инспириран од TOYOTA GAZOO RACING, GR SPORT изведбата има помоќен изглед кој го истакнува остриот и динамичен стил на Corolla со уникатни елементи на надворешниот и внатрешниот дизајн.
Новата Corolla GR SPORT има нов дизајн на 18-инчни машински обработени алуминиумски бандажи и нов изглед на задниот браник и дифузерот. Седиштата имаат свеж финиш со логото GR врежано во потпирачот за глава и нов дизајн во сребрените ленти долж работ на потпирачот. Логото GR сега е исто така додадено и на копчето за стартување на моторот.
Новата Corolla е опремена со Toyota T-Mate, ова ја комбинира најновата генерација на Toyota Safety Sense пакетот со други активни системи за помош при возење и паркирање кои не само што го олеснуваат и го прават возењето побезбедно, туку помагаат и во заштитата на сите патници во возилото и другите учесници во сообраќајот. Подобрувањата во работата и функционалноста на системите вклучуваат Acceleration Suppression, кој реагира на ненадејна употреба на педалот за гас при патување со мала брзина, поддршка за избегнување судир при вртење на раскрсница, помош при управување во итни случаи што сега може да реагира на возилата што доаѓаат од спротивната страна, избегнување страничен судир и намалување на брзината во свиоци. Софтверските ажурирања преку воздух ќе ги одржуваат ажурирани функциите и ќе овозможат додавање нови кога ќе станат достапни.
