По првичната оптимизација на крајот на 2021 година, која го зголеми опсегот за 6,5% (+22 километри), Peugeot e-208 ќе има корист од големата технолошка промена во 2023 година за да го вклучи моторот на новиот Peugeot e-308. Со тоа максималната моќност ќе се зголеми за 15%, од 136 коњски сили на 156 коњски сили, додека промената во ефикасноста ќе ја намали просечната потрошувачка на енергија на само 12 kWh, зголемувајќи го досегот за 10,5%, или 38 километри и со тоа ќе достигне досег до 400 километри со полна батерија.
Новата верзија на 100% електричниот Peugeot e-208 доаѓа со нов мотор со моќност од 156 коњски сили и 260 Nm вртежен момент достапен од 0 км/ч за инстантна респонзивност. Резултатот е уште поголемо уживање во возењето, без вибрации, без бучава и без емисија на CO2. Добива и нова поефикасна високонапонска батерија, со капацитет од 51 kWh (48,1 kWh корисни) која работи на 400 волти. Ефикасноста беше во центарот на грижата на дизајнерите за овој нов погон, а со тоа се добива просечна потрошувачка од 12 kWh на 100 изминати километри.
Првата фаза на оптимизација имплементираше низа новости, кои секако се присутни и во новиот е-208. Топлинската пумпа заедно со сензорот за влажност инсталиран на врвот на шофершајбната ја максимизира енергетската ефикасност на греењето и климатизацијата. Информациите што ги пренесува сензорот овозможуваат попрецизно да се контролира кружењето на воздухот во патничкиот простор и на крајот, да се зачува количината на енергија содржана во батеријата при загревање и одржување на температурата во возилото. Тука се и специјалните пневматици од А+ класата што ја минимизираат загубата на енергија преку триење, а променет е и односот на менувачот за да се добие поголема ефикасност во секакви услови на возење.
На Peugeot e-208 се достапни два типа на вградени полначи, за да одговараат на сите намени и сите решенија за полнење – стандардно, еднофазен полнач од 7,4 kW и како опција, трифазен полнач од 11 kW. Дополнително, Peugeot e-208 е способен за брзо полнење. На брзите полначи од 100 kW, можно е полнење од 20% до 80% за помалку од 25 минути.
Благодарение на копче на централната конзола, возачот може да избере еден од трите достапни режими на возење (ECO, NORMAL и SPORT) за да го зголеми опсегот или перформансите. Преку режимот „BRAKE“, активиран со друго копче поставено на менувачот, возачот може да го зголеми и обновувањето на енергијата додека го нагласува забавувањето при отпуштање на педалата за гас.
