Имагинацијата е моторот на иновациите. Јужнокорејскиот производител на автомобили го прифати ова мото и ги зајакнува своите напори да измисли нови работи од година во година. Тие не сакаат да заглават и тоа целосно се рефлектира во автомобилите. Земете го новиот Tucson, на пример: ова е најоригиналниот и најмодерен модел на брендот. А денес ќе зборуваме токму за новиот SUV на Hyundai, опремен со 1.6-литарски дизел мотор и Premium ниво на опременост.
Hyundai е производител на автомобили што дојде во Европа релативно неодамна, официјално започна со продажба на европскиот пазар во 2000 година. На почетокот, конкурентноста не беше она што можеше да се замисли, но Hyundai учеше, стекнуваше искуство и со текот на времето, стигна таму каде што е денес. Прекрасен пример е развојот на моделот Tucson, чија прва генерација дојде во Европа во 2004 година. Овој автомобил многумина го нарекуваа „грдото пајче“ поради дизајнот, а дури и технологијата и опремата не беа стандардни за тоа време. Како прв обид, сепак тоа не беше неуспех за брендот. Втората генерација дојде во 2009 година, но во Европа го носеше името ix35. Од аспект на дизајнот, тоа беше многу голем скок, но во најдобар случај сеуште некако губеше од конкуренцијата. Третата генерација, онаа во заминување, веќе се совпадна со конкуренцијата и успеа гордо да и се спротистави. И во поглед на дизајнот и од гледна точка на технологијата и опременоста. А популарноста кај клиентите се потврдува со фактот дека се продадени повеќе од седум милиони примероци на глобално ниво, од кои на европските патишта се возат околу 1.4 милиони примероци.
На прв поглед, новиот Hyundai Tucson е автомобил што не можете да го помешате со ниту еден друг автомобил. Производителот го примени новиот „Sensous sportiness“ дизајнерски јазик кој вклучува и „Parametric dynamics“ елементи. Можеби звучи комплицирано, но резултатот воопшто не изгледа лошо, особено не кога ќе го видите во живо. На предниот дел доминира карактеристична решетка, чии агли се претвораат во фарови кога ќе се вклучат дневните светла – Hyundai овие светла ги нарекува „Angel Wings“ и навистина личат такви. Главните светла се сместени во долниот дел на браникот, а тестираниот модел беше опремен со Full LED осветлување. Замислениот и иновативен дизајн продолжува и од страните, каде има карактеристични пластични екстензии на браниците и крилата, но главниот елемент се две линии во „Z“ форма на предните и задните врати. Карактеристичен хромиран елемент поминува од столбот А до столбот Ц веднаш под покривот. Дизајнот на задниот дел е исто така уникатен и иновативен, главниот збор тука го имаат задните светла кои Hyundai ги нарекува „parametric lights“ и тие минуваат низ целата ширина на автомобилот, а завршуваат со два „заби“ од секоја страна. Како и предните, така и овие светла се со LED технологија – основните нивоа не се опремени со LED светла туку со стандардни сијалици. Интересен детал е позицијата на која е поставен задниот бришач, тој е скриен во горниот дел од прозорецот под спојлерот на покривот. Логото на брендот е поставено директно во стаклото и иако изгледа пластично, тоа е мазно со стаклото – уште еден кул детал. Новиот Tucson е достапен во девет бои за каросеријата, во кои доминираат црните и сивите нијанси, но има и неколку црвени нијанси, како и една бронзена боја. Дополнително може да земете и црн покрив – како што има тест моделот.
Внатрешноста ве тера да ги заборавите старите времиња – и на изглед и со технологија. Пред возачот е сместена дигитална инструмент табла со дисплеј од 10.25-инчи, а веднаш ќе приметите дека целосно недостасува оној „капак“ над инструментите и изгледа малку празно, но реално овозможува подобра прегледност. Целосно рамниот централен панел комбинира исто така 10.25-инчен дисплеј за инфо-забавниот систем со неколку копчиња на допир поставени под дисплејот кои служат за брз пристап до одредени функции. Ова е одлично естетско решение, но не е целосно идеално од гледна точка на работа. За разлика од ротационите и класични контроли кои лесно може да се ракуваат и без да го тргнете поглед од патот, тука во овој случај секогаш треба да го тргнете погледот за да најдете што точно сакате да притиснете. За пофалба е тоа што под инфо-забавниот систем се наоѓа засебен панел со контроли за клима уредот – и тука сите функции се преку копчиња на допир, но барем добро се распоредени. Централната конзола има перфектна висина и ширина со што сте одделени од совозачот, она што не ми се допаѓа тука е решението за брзини. Наместо класична рачка, поставени се четири копчиња D, N, R и P кои бараат одредено време за привикнување. Да, контролата со вакви копчиња заштедува простор и убаво се совпаѓа со сјајно црниот панел (кој воедно е магнет за прашина и отпечатоци од прсти), но едноставно не е баш најпрактично решение. Меѓутоа, за пофалба се добро димензионираните држачи за пијалоци, големата преграда со безжично полнење за паметни телефони и практичните простории за складирање во долниот дел.
Да се навратиме на инфо-забавниот ситем за момент. Резолуцијата на дисплејот е достоинствена и чиста, работи многу брзо и е лесен за ракување. Иконите на сите видови функции се доволно големи и кратенките на допир под дисплејот ќе ви помогнат да го изберете она што го барате без да вртите по целото мени. Поврзувањето на телефонот е брзо и можете да користите Android Auto и Apple Carplay, но за жал не е wireless туку телефонот мора да биде приклучен со кабел. Јасен ефект има и дигиталната табла со инструменти со кружен приказ на брзинометарот и тахометарот, чија графика се менува во зависност од избраниот режим на возење или директно преку инфо-забавниот систем. Внатрешноста изгледа навистина добро и не само тоа, туку е и доста квалитетно изработена, искористените материјалите се повеќе од добри, а завршната обработка е одлична. Многу интересно изгледа и текстилниот појас, кој се протега од панелите на вратите и оди преку целата контролна табла. Предните седишта обезбедуваат добра поддршка и доволна удобност, но во пределот на нозете би можеле за нијанса да бидат малку пошироки.
Што се однесува до просторот на задните седишта, новиот Tucson има подолго меѓуоскино растојание за 10 милиметри и 25 милиметри повеќе простор за нозете на патниците на задната клупа. Седењето е навистина удобно и широко, а благодарение на едноставните форми на клупата и целокупната ширина на кабината, не би било проблем да патуваат и тројца патници во вториот ред седишта. Барем не за некои пократки релации. Багажниот простор е различен за секоја моторизација, тука со традиционален дизел мотор нуди волумен од 598 литри, а со спуштање на задната клупа се добива волумен од 1725 литри. Багажниот простор задоволува со своите едноставни форми, потпирачите за грб поделени во идеален сооднос 40:20:40, можноста да ги спуштите директно од багажникот и речиси рамниот под со браникот што овозможува лесно ставање и вадење на поголеми и потешки работи.
Новиот Tucson е достапен со богата понуда на мотори која вклучува бензински и дизел, како и хибридни и Plug-In хибридни верзии. Кај бензинците понудата се состои од 1.6-литарски T-GDi турбо-бензинец со 150 и 180 коњски сили. Послабата верзија е достапна само со 6-степен мануелен менувач, додека помоќната верзија стандардно доаѓа со 7-степен DCT автоматски менувач. Кај дизелите достапен е 1.6-литарски CRDi мотор со 115 и со 136 коњски сили и исто така, првиот е достапен со мануелен менувач, а вториот само со автоматски менувач. Верзиите со помоќниот мотор се достапни како опција и со погон на сите четири тркала. Хибридната верзија го користи истиот 1.6-литарски T-GDi, а благодарение на електромоторот испорачува 230 коњски сили.
Тестираниот модел под хаубата го има 1.6-литарскиот дизел мотор кој испорачува 136 коњски сили при 4000 вртежи во минута и 280 Nm вртежен момент од 1500 вртежи во минута. Забрзувањето од 0 до 100 километри на час трае 11.4 секунди, додека максималната брзина е 180 километри на час. Силата во овој случај ја пренесува на предните тркала преку рафиниран 7-степен автоматски менувач со двојна спојка. Моторот е поддржан од 48V mild-hybrid систем и благодарение на стартер-генераторот се уклучува и исклучува подоцна и порано отколку со конвенционално дизајнираните единици. Перформансите кои ги нуди се навистина доволни со оглед на намената на возилото. За пофалба е и квалитетната соработка на моторот со менувачот, менувањето е мазно и речиси неприметливо, а одлично реагира и кога ќе ја притиснете педалата за гас поагресивно. Исто така, може да понуди и добра економичност, во текот на тестирањето јас измерив просечна потрошувачка од 6.5 до 7 литри во градски услови и 5.5 литри на отворено.
Комбинацијата на новата N3 платформа со McPherson предна суспензија, мултилинк задна оска, подобрена геометрија и задни амортизери со нова технологија на вентилите го прават Tucson многу пријатен автомобил на македонските (не толку добри) патишта. Шасијата е пријатно покрута и благодарение на тоа, автомобилот одржува одлична стабилност во свиоци, но во исто време одржува и солидна удобност. Тест моделот со 18-инчни бандажи одлично ги филтрираше сите дупки и нерамнини на патот без притоа да се чувстуваат удари во кабината. Самото управување е доста моќно и лесно, така што Tucson е лесен за маневрирање дури и во тесни улици и при паркирање, но нема скоро никакви повратни информации од подлогата. Достапни се три режими на возење – Eco, Normal и Sport. Првите два режими се идеални за секојдневно релаксирано возење, додека во Sport режимот, управувањето станува покруто, педалата за гас е доста пореспонзивна и менувачот ги држи брзините на повисоки вртежи. Иако автомобилот однадвор изгледа остро и динамично, не нуди никакви големи задоволства зад управувачот. Попријатно е едноставно да останете во нормален режим и да уживате во мазно и опуштено возење. Бев навистина задоволен од целокупното подесување на автомобилот, поради фокусот кој е ставен на комфорноста и рафинираноста, го прави токму она што потенцијалните клиенти би го очекувале од еден автомобил во оваа категорија.
Почетната цена на Hyundai Tucson 1.6 T-GDi 150 2WD изнесува 23.900 евра.
Цената на тестираниот модел Hyundai Tucson 1.6 CRDi MHEV DCT Premium изнесува 34.000 евра.
ГАЛЕРИЈА ОД ТЕСТИРАНИОТ МОДЕЛ
Повеќе информации за возилото може да најдете ТУКА или да го посетите продажниот салон на Ми-Да Гранд Моторс.